Search

जिल्हा माहिती कार्यालय, औरंगाबाद

माहिती व जनसंपर्क महासंचालनालय, महाराष्ट्र शासन

Author

जिल्हा माहिती कार्यालय, औरंगाबाद.

जिल्हा माहिती कार्यालय, औरंगाबाद. माहिती व जनसंपर्क महासंचालनालय, महाराष्ट्र शासन.

मराठी भाषेला अधिक समृद्ध करा : गणेश रामदासी

  • मराठी भाषा गौरव दिनानिमित्त विशेष कार्यक्रम

औरंगाबाद, दि. 27 (जिमाका) :   संतांची भूमी असलेल्या मराठवाड्याला थोर अशी संत परंपरा लाभलेली आहे. संतांच्या ओव्या, अभंग, ग्रंथांच्या माध्यमातून मराठी अजरामर झाली. या मराठीची समृद्धी वाढविण्यासाठी मराठीचे संस्कार, संस्कृती जतन करण्यासाठी मराठी भाषेचा प्रत्येकाने आग्रह धरून मराठीचा वापर वाढविला पाहिजे. या आग्रहाची सुरूवात स्वत:पासून करावी, असे प्रतिपादन माहिती व जनसंपर्क महासंचालनालयाचे मराठवाडा विभागाचे संचालक गणेश रामदासी यांनी केले.

शासकीय विभागीय ग्रंथालयामध्ये शासकीय विभागीय ग्रंथालय, जिल्हा ग्रंथालय अधिकारी कार्यालय आणि जिल्हा माहिती कार्यालयाच्यावतीने मराठी भाषा गौरव दिनानिमित्त ग्रंथ प्रदर्शन व व्याख्यानाचे आयोजन करण्यात आले होते. यावेळी श्री. रामदासी बोलत होते.  या कार्यक्रमास मनपा उपायुक्त कमलाकर फड, मानव विकास मिशनचे उपायुक्त धूपचंद राठोड, जिल्हा माहिती अधिकारी मुकुंद चिलवंत, जिल्हा ग्रंथालय अधिकारी सुभाष साबळे, सहायक संचालक सुनील हुसे, विभागीय ग्रंथपाल सुभाष मुंढे, ज्येष्ठ पत्रकार अण्णासाहेब वैद्य आदी उपस्थित होते.

श्री. रामदासी म्हणाले, पूर्वी संत परंपरेतून आलेल्या ओव्या, अभंग ऐकायला मिळत. आता तशी परिस्थिती क्वचित पहावयास मिळते. आपली मराठी श्रेष्ठ, समृद्ध अशी भाषा आहे. दासबोधांपासून मुकुंदराजांपर्यंत, संत तुकारामांपासून चक्रधरांपर्यंतच्या साहित्यात शब्दांची वैविध्यता, भाषेचे लालित्य समजण्यास मदत होते. पंजाबमध्ये संत नामदेवाच्या अभंग, ओव्यांना सहज स्वीकारले. इंग्रजीनेही मराठीतून अनेक शब्द घेतलेले आहेत. तसेच मराठीनेही अन्य भाषेतील शब्द संपदेबाबत सर्व समावेशक पद्धतीने विचार करून अधिक समृद्ध होणे आवश्यक असल्याचे मत श्री. रामदासी यांनी मांडले.

मराठी भाषेला उत्तम व्यासपीठ दिल्लीमध्ये आहे. तेथील महाराष्ट्र परिचय केंद्र मोठ्याप्रमाणात मराठी भाषेच्या प्रचार आणि प्रसारासाठी कार्य करत असते. त्यांच्या ग्रंथालयातून मराठीला अधिक समृद्ध करण्याच्या दृष्टीने सातत्याने प्रयत्न करण्यात येतात. विविध उपक्रम राबविण्यात येतात. संघ लोकसेवा आयोगाच्या उमेदवारांच्या व्यक्तीमत्त्व चाचण्यांची तयारीही महाराष्ट्र परिचय केंद्रामार्फत करण्यात येते. त्याच धर्तीवर जिल्हा माहिती कार्यालय, माहिती केंद्र आणि ग्रंथालय कार्यालयाच्या संयुक्त विद्यमाने विविध नवोपक्रम राबविण्यात यावे. जिल्ह्यातील विविध ग्रंथालयात मिळणारी ग्रंथांची माहिती एकाच छताखाली उपलब्ध होईल, या दृष्टीने विचार व्हावा, अशी अपेक्षा श्री.रामदासी यांनी ग्रंथालयाकडून व्यक्त केली.

मराठी भाषेचा गौरव करताना दैनंदिन वापरात प्रत्येकाने कटाक्षाने मराठीचा वापर करण्यास प्राधान्य द्यावे, असे मत मांडले. वर्षभर आपण अनेक दिन साजरे करत असतो. त्यातीलच एक महत्त्वाचा असा मराठी भाषा गौरव दिन आहे. या ‍दिनाचे औचित्य साधून प्रत्येकाने दैनंदिन कामकाजात मराठीलाच प्राधान्य द्यावे. मराठी भाषेच्या दैनंदिन वापराबरोबरच ती आचरणात देखील आणावी, असे श्री. राठोड म्हणाले.

श्री.फड यांनी साहित्य वाचनाचे महत्त्व विषद करताना आठवीपासून पदवी शिक्षणापर्यंत महत्त्वाचे साहित्य शासकीय ग्रंथालयात वाचले. या वाचनाचा स्पर्धा परीक्षेसाठी अत्यंत उपयोग झाला, असल्याचे सांगितले. शासनाने मराठी भाषा समृद्ध करण्यासाठी पुढाकार घेतलेला आहेच. परंतु सर्व शाळांमध्ये सकाळच्या सत्रामध्ये मराठी भाषेच्या एखाद्या पाठाचे वाचनदेखील होणे अपेक्षित असल्याचे श्री. फड म्हणाले. त्यातून आगामी काळात मराठी अधिकाधिक समृद्ध होईल, असे मत मांडले.

श्री. हुसे यांनी साहित्य वाचनाचे महत्त्व सांगितले. जिल्हा माहिती कार्यालय, जिल्हा ग्रंथालयाच्या माध्यमातून वाचन, वाचक चळवळीला विविध उपक्रमांतून पुढे नेण्याचा प्रयत्न होत असतो. वाचनाची आवड निर्माण झाल्यास त्यातून समृद्ध वाचक घडत असतो. आजच्या काळात इंग्रजी शब्दांचा वापर अधिकाधिक वाढत चाललेला आहे. तो टाळता येणे शक्य आहे. त्यासाठी प्रत्येकाने मराठीचा आग्रह धरावा. दररोज किमान इंग्रजी वापरातील शब्द टाळून मराठी शब्दाचा जाणीवपूर्वक वापर करावा, असे आवाहनही श्री. हुसे यांनी करताना मराठी भाषा दैनंदिन जीवनात अंगीकारून कृतीशील बनण्याचे आवाहन केले.

कार्यक्रमाचा अध्यक्षीय समारोपात श्री. वैद्य यांनी संतांनी मराठी भाषेला सर्वगुणसंपन्न केले. आज साहित्य संमेलने, कवी संमेलने आयोजित करण्यात येतात. यामध्ये मराठी भाषा अग्रस्थानी आहे. मराठी भाषा ज्ञानाची भाषा आहे. इंग्रजी विज्ञानाची भाषा आहे. त्यामुळे दैनंदिन व्यवहारात मराठीचा वापर प्रत्येकाने करायलाच हवा. संत बहिणाबाई चौधरी, वि.वा. शिरवाडकर ऊर्फ कुसुमाग्रज यांनी मराठी भाषेत साहित्याची रचना केली. मराठीला सर्वगुण संपन्न बनविण्यासाठी प्रयत्न केले.

इतर भाषक ज्याप्रमाणे त्यांच्या भाषेचा अभिमान बाळगतात, त्याचप्रकारे मराठी भाषकांनी मराठी भाषेचा अभिमान बाळगणे, आजच्या काळाची गरज असल्याचे श्री. वैद्य म्हणाले. मराठी भाषेतील चांगले स्वीकारून तिला अधिक सर्वगुण संपन्न बनविण्यासाठी मराठी भाषेचा आग्रह हा तर प्रत्येकाने धरायलाच हवा, असेही श्री. वैद्य यांनी सांगितले.

मराठी भाषेतील वर्णमाला ‘अ’ पासून सुरू होऊन ‘ज्ञ’ पर्यंत आहे. याचाच अर्थ असा, की मराठी भाषा अज्ञानापासून सुरू होते व ज्ञान देऊन थांबते, ही मराठीची थोरवी आहे, असे मनोगत ग्रंथालयातील वाचक महेश जाधव याने व्यक्त केले. राजेश राठोड यांनीही मराठी भाषेचा गौरव करताना विचार मांडले.

प्रास्ताविकात श्री. मुंढे यांनी मराठी भाषा गौरव दिनाची भूमिका विषद केली. प्रत्येकाने मराठीत बोलावे, ऐकावे, वाचावे, पहावे असेही त्यांनी सांगितले. मराठी भाषा समृद्ध करण्यासाठी जिल्हा ग्रंथालयाच्या माध्यमातून विविध उपक्रम राबविण्यात येतात, याबाबतही त्यांनी यावेळी उपस्थितांना माहिती दिली.

सुरूवातीला मान्यवरांच्याहस्ते फीत कापून ग्रंथ प्रदर्शनाचे उद्घाटन करण्यात आले. त्यानंतर दीपप्रज्वलन करण्यात आले. यावेळी ज्येष्ठ कवी वि.वा.‍ शिरवाडकर यांच्या प्रतिमेस पुष्पहार अर्पण करून अभिवादन करण्यात आले. मान्यवरांना ग्रंथ, पुष्प भेट देऊन सन्मानित करण्यात आले.

श्री.मुंढे यांनी उपस्थितांना मराठी भाषेची प्रतिज्ञा दिली. सूत्रसंचालन मयूर तावडे यांनी केले. श्री. मुंढे यांनी आभार मानले.

******

मराठी भाषा गौरव दिनानिमित्त विभागीय ग्रंथालयात उद्या विशेष कार्यक्रम

marathi bhasha din photo

औरंगाबाद, दिनांक 25 (जिमाका) :  ज्येष्ठ कवी वि.वा. शिरवाडकर ऊर्फ कुसुमाग्रज यांचा 27 फेब्रुवारी हा जन्मदिन मराठी भाषा गौरव दिन म्हणून साजरा करण्यात येतो. शासकीय विभागीय ग्रंथालय, जिल्हा ग्रंथालय अधिकारी कार्यालय आणि जिल्हा माहिती कार्यालयाच्यावतीने मराठी भाषा गौरव दिनानिमित्त 27 फेब्रुवारी रोजी सकाळी 10.30 वाजता औरंगाबाद शासकीय विभागीय ग्रंथालय येथे ग्रंथ प्रदर्शन व व्याख्यानाचे आयोजन करण्यात आले आहे.

या कार्यक्रमाच्या अध्यक्षस्थानी सहायक ग्रंथालय संचालक सुनील हुसे, उद्घाटक म्हणून मनपा उपायुक्त कमलाकर फड, मानव विकास मिशनचे उपायुक्त धुपचंद राठोड यांचीही उपस्थिती असणार आहे. तरी या कार्यक्रमास बहुसंख्येने उपस्थित राहण्याचे आवाहन जिल्हा ग्रंथालय अधिकारी सुभाष साबळे, जिल्हा माहिती अधिकारी मुकुंद चिलवंत, विभागीय ग्रंथपाल सुभाष मुंढे यांनी केले आहे.

****

महात्मा जोतीराव फुले शेतकरी कर्जमुक्ती योजनेच्या आधार प्रमाणीकरणास सुरवात

औरंगाबाद, दिनांक 24 (जिमाका) : महात्मा जोतीराव फुले शेतकरी कर्जमुक्ती योजनेच्या आधार प्रमाणीकरणास औरंगाबाद जिल्ह्यातील पैठण तालुक्यातील पाचोड (बु) येथून आज सुरवात करण्यात आली. योजनेतील लाभार्थ्यांची प्राथमिक यादी पाचोड येथे जिल्हा मध्यवर्ती सहकारी बँकेत पैठण कृषी उत्पन्न बाजार समितीचे सभापती राजूनाना भूमरे यांच्या हस्ते प्रसिद्ध करण्यात आली.

आधार प्रमाणीकरण करून सोप्या, सुटसुटीत अशा पद्धतीने पात्र लाभार्थ्यांना लाभ देण्यास सुरुवात झाली आहे. त्याचप्रमाणे लाभ मिळाल्याची प्रक्रिया सुरू झाल्याचे शेतकऱ्यांना त्यांच्या मोबाईलवर एसएमएस प्राप्त होत असल्याचे जिल्हा उपनिबंधक अनिलकुमार दाबशेडे यांनी सांगितले.

या योजनेत पाचोड (बु) मधील ग्रामीण बँक, राष्ट्रीयकृत बँक, बँक ऑफ बडोदा, जिल्हा मध्यवर्ती बँकांच्या 242 सभासदांची प्राथमिक यादी शासनाने त्या-त्या बँकांच्या स्तरावर प्रसिद्ध केलेली आहे. त्यापैकी 55 सभासदांचे आधार प्रमाणीकरण यशस्वी झाले आहे. सिल्लोड गावातील  582 लाभार्थी शेतकऱ्यांच्या 899 खात्यांपैकी 180 खात्यांचे आधार प्रमाणीकरण यशस्वीरित्या पुर्ण झाले असून उर्वरित आधार प्रमाणीकरण करण्याचे काम औरंगाबाद जिल्हा मध्यवर्ती सहकारी  बँकेत आणि आपले सरकार सेवा केंद्रावर सुरू आहे.

जिल्ह्यात या योजनेमध्ये एकुण 2 लाख 24 हजार 883 एवढे लाभार्थी आहेत. त्यापैकी 2 लाख 23 हजार 566 लाभार्थ्यांचे आधार जोडणी झालेली असून 1 हजार 277 लाभार्थ्यांचे आधार जोडणी प्रक्रिया बॅंकांमार्फत तसेच क्षेत्रीय अधिकारी यांच्याद्वारा संबंधितांशी संपर्क साधून लवकरच पूर्ण करण्यात येणार आहे. आतापर्यंत 99.43 टक्के लाभार्थ्यांची आधार जोडणी झालेली आहे. तसेच 199495 एवढ्या लाभार्थ्यांची माहिती बॅंकांद्वारा पोर्टलवर अपलोड करण्यात आलेली आहे . तसेच उर्वरीत लाभार्थ्यांची माहिती अपलोड करण्याची प्रक्रिया बॅंकांद्वारा सुरू आहे. या योजनेव्दारे अंदाजीत सरासरी 1482 कोटी 70 लाख  एवढ्या रकमेची कर्जमाफी होणार असल्याचे  जिल्हा उपनिबंधक अनिल दाबशेडे यांनी सांगितले.

या योजनेंतर्गत पाचोड येथील भास्कर दळवी यांना 46854 रुपयांच्या कर्जमुक्तीचा लाभ मिळणार आहे. ही शेतक-यांसाठी अतिशय उपयुक्त योजना असून अशी  चांगली योजना राबवल्याबद्दल त्यांनी समाधान आणि शासनाचे आभार व्यक्त केले. तसेच अंकुश नरवडे या शेतकऱ्याने 1 लाख 97 हजार 616 एवढी मोठी कर्जमुक्ती मिळणार असल्याने खुप मोठा भार हलका झाल्याचे समाधान व्यक्त केले. सुभाष भोजने, दिलीप  भूमरे, पांडूरंग भूमरे या शेतक-यांनी कर्जमुक्तीमूळे मोठा दिलासा मिळाल्याच्या भावना व्यक्त केल्या. माझ्यावर 20 हजार रूपयांचे पीककर्ज होते परंतु या सरकारने गरिबांचे दु:ख जाणुन सोप्या पद्धतीने कर्जमुक्ती केली. त्यामुळे शासनाने ही कर्जमुक्ती करून चांगला हातभार लावल्याची भावना श्रीमती ज्योती भुमरे यांनी व्यक्त केली. अमोल भूमरे यांनी कुठल्याही प्रकारचे हेलपाटे न घालता सहजपणे ही कर्जमुक्ती मिळाल्याचा आनंद व्यक्त करून शासनाच्या गतिमान कार्यपद्धतीबद्दल समाधान व्यक्त केले.

श्री. भूमरे आणि श्री. दाबशेडे यांच्याहस्ते प्रातिनिधिक स्वरूपात शेतकऱ्यांचा सत्कार करण्यात आला. या कार्यक्रमास सहायक निबंधक दिलीप गवंडर, माहिती तंत्रज्ञान अधिकारी मयुर मयंक, कर्ज वितरण अधिकारी श्याम तांगडे, श्री. गोर्डे, श्री. बारगजे, श्री. कासार,  पाचोड विविध कार्यकारी सेवा सहकारी सोसायटीचे अध्यक्ष जिजा पा.भुमरे, राम पा.नरवडे, भास्कर दळवी, अंकुश नरवडे, शिवाजीराव भुमरे, आबा पा.भुमरे,  पाचोडचे (खु)सरपंच नितिन वाघ आदी उपस्थित होते. या योजनेनुसार 1 एप्रिल 2015 ते 31 मार्च 2019 पर्यंत उचल केलेल्या एकापेक्षा जास्त कर्ज खात्यात अल्पमुदत पीककर्ज व अल्पमुदत पीककर्जाच्या पुनर्गठीत कर्जाची 30 सप्टेंबर 2019 रोजी असलेली थकबाकीची परतफेड न केलेली रक्कम 2 लाखांपेक्षा कमी असल्यास अशा सर्व खातेदारांना दोन लाख मर्यादेपर्यंत कर्जमुक्तीचा लाभ देण्यात येणार आहे.

******

मराठवाड्यात पाणी साठवणूक, समन्यायी पाणी वाटप आवश्यक : राजेश टोपे

  • तज्ज्ञांच्या उपस्थितीत पीक-पाणी परिषदेत मंथन

औरंगाबाद, दिनांक 20 (जिमाका) :  मराठवाड्यात पाणी साठवणूक व्यवस्था, समन्यायी पाणी वाटपाची आवश्यकता आहे. येथील आर्थिक, भौगोलिक अनुशेष दूर करण्यासाठी आवश्यक निधीसाठी आपणही आग्रही असल्याचे मत सार्वजनिक आरोग्य मंत्री राजेश टोपे यांनी व्यक्त करत परिषदेस शुभेच्छा दिल्या.

शहरातील एका हॉटेल मध्ये आयोजित पीक पाणी परिषदेच्या ‘मराठवाडा विभागातील पाणी प्रश्न मंथन आणि दिशा’ यावर श्री. टोपे उद्घाटनप्रसंगी बोलत होते. यावेळी व्यासपीठावर सर्वश्री आमदार सतीश चव्हाण, अंबादास दानवे, उदयसिंह राजपूत, रमेश बोरनारे, प्रशांत बंब, महापौर नंदकुमार घोडेले, उपमहापौर राजेंद्र जंजाळ, परिषदेचे संयोजक चंद्रकांत खैरे, औरंगाबाद मध्यवर्ती सहकारी बँकेचे अध्यक्ष नितीन पाटील, अर्जुन खोतकर, कल्याण काळे, जल तज्ज्ञ एच.एम. देसरडा उपस्थित होते.

मंत्री श्री.टोपे म्हणाले,  या परिषदेतून पाण्याबाबत जनजागृती होईल. मराठवाड्यातील नांदेड वगळता इतर जिल्हे पर्जन्यछायेतील जिल्हे आहेत. त्यामुळे येथे पर्जन्यमान कमी आहे. त्यातून पिण्याचे पाणी, शेतीसाठी पाणी, उद्योगासाठी पाणी यांचे दुर्भिक्ष येथे आहे. पश्चिम महाराष्ट्र, विदर्भाच्या तुलनेत मराठवाड्यातील धरणे पूर्णतः दरवर्षी पूर्ण क्षमतेने भरत नाहीत.  कृष्णा खोरे, विदर्भातून, पश्चिम वाहिन्यांमधून मराठवाड्याला पाणी उपलब्ध व्हावे. तसेच या प्रश्नावर उपाय म्हणून पाण्याच्या साठवणूक व्यवस्थेची आवश्यकता आहे. कृष्णा खोरेच्या धर्तीवरच अधिक जास्त पाण्याची व्यवस्था मराठवाड्यात करावी लागेल. पिण्याच्या पाण्याला प्राधान्य देताना शेती, उद्योगाचाही विचार व्हायला हवा. यासाठी वितरिका व्यवस्थापनही महत्त्वाचे आहे. चाऱ्या, पोट चाऱ्या, कॅनॉल दुरुस्ती कार्यक्षमपणे होणे आवश्यक असल्याचे श्री. टोपे म्हणाले.

पाण्याचा पुनर्वापर, जलसाक्षरता, जलसंवर्धन, ठिबक सिंचनाचा बंधनकारक वापर करून पाण्याचा योग्य पद्धतीने वापर होण्यासाठी प्रत्यक्षात अंमलबजावणी व्हावी, अशी अपेक्षाही श्री. टोपे यांनी व्यक्त केली.

माजी मंत्री खोतकर यांनी ‘पायथा ते माथा’ धरणे भरण्यात यावीत, यासाठी लोकप्रतिनिधींनी विधिमंडळात आग्रही राहावे, असे मत मांडले. तर श्री. काळे यांनी या परिषदेतून सर्वसमावेशक असा परिपूर्ण अहवाल तयार करण्यात येऊन येथील पाण्याचे दुर्भिक्ष दूर करण्यासाठी सोबत असल्याचे सांगितले.

सुरुवातीला मान्यवरांनी छत्रपती शिवराय, स्व.बाळासाहेब ठाकरे, स्व. गोविंदभाई श्रॉफ यांच्या प्रतिमेस पुष्पहार अर्पण करून अभिवादन केले. त्यानंतर मराठवाड्यातील सर्व नद्यांचे जलपूजन करून परिषदेस सुरुवात झाली.

तज्ज्ञांच्या उपस्थितीत मंथन

पहिल्या सत्रात जल तज्ज्ञ सर्वश्री. देसरडा, प्रदीप पुरंदरे, मराठवाडा जनता विकास परिषदेचे अध्यक्ष प्रदीप देशमुख, सुहासिनी पौळ, उदय देवळाणकर यांनी विचार मांडले.  श्री. पुरंदरे यांनी मराठवाड्यातील तपमान वाढ आणि वाळवंटीकरण यावर सादरीकरण केले. श्री. देशमुख यांनी  एकात्मिक जल व्यवस्थापन आराखड्याचा शासनाने अभ्यास करून पाणी वाटप करावे, अशी अपेक्षा व्यक्त केली. श्री. देवळाणकर यांनी ‘मराठवाड्याच्या पावसाचा इतिहास’ यावर मार्गदर्शन केले.

******

छत्रपती शिवाजी महाराज जयंती जिल्हाधिकारी कार्यालयात साजरी

औरंगाबाद, दि. 19 (जिमाका) : छत्रपती शिवाजी महाराज जयंतीनिमित्त जिल्हाधिकारी कार्यालयात  निवासी उपजिल्हाधिकारी संजीव जाधवर यांच्याहस्ते छत्रपती शिवाजी महाराजांच्या प्रतिमेला पुष्पहार अर्पण करून अभिवादन करण्यात आले. यावेळी सामान्य प्रशासन विभागाच्या उपजिल्हाधिकारी रिता मैत्रेवार,  जिल्हाधिकारी कार्यालयातील अधिकारी, कर्मचारी बहुसंख्येने उपस्थित होते. त्यांनीही छत्रपती शिवाजी महाराजांच्या प्रतिमेस पुष्प अर्पण करून अभिवादन केले.

******

ग्राहक संरक्षण परिषद, दक्षता समितीच्या बैठकीत विविध विषयांवर चर्चा

_DSC9549 (1)

औरंगाबाद, दि. 22 (जिमाका) –   प्रधानमंत्री किसान सन्मान योजना, पीक विमा, अवैध वाहतुकीवर कारवाई करणे, शिधापत्रिका वाटप आदी विषयांवर जिल्हा ग्राहक संरक्षण परिषदेच्या बैठकीत चर्चा झाली. यावेळी जिल्हा पुरवठा अधिकारी  महादेव किरवले यांनी संबंधित अधिकाऱ्यांना योग्य त्या सूचना केल्या.

जिल्हा पुरवठा अधिकारी श्री.किरवले यांच्या दालनात ग्राहक संरक्षण परिषद व जिल्हा दक्षता समितीची बैठक पार पडली. बैठकीस समितीचे सदस्य प्रभाकर कुलकर्णी, एकनाथ गवळी, राजेश मेहता, रावसाहेब नाडे, जिजा मते, संगीता धारूरकर, मीरा काथार, युवराज बनकर, डॉ. जी.एम कुंडलीकर, सं.ज्ञा.अंधोरीकर, डी. एम.दिवटे, ज्यो. बा. जाधव आदींची उपस्थिती होती.

******

जिल्हाधिकारी कार्यालयात संत सेवालाल महाराज जयंती साजरी

15 P

औरंगाबाद, दिनांक 15 (जिमाका) :  संत सेवालाल महाराज यांच्या जयंतीनिमित्त जिल्हाधिकारी कार्यालयात प्रभारी जिल्हाधिकारी भानुदास पालवे यांनी संत सेवालाल महाराज यांच्या प्रतिमेला पुष्पहार अर्पण करून अभिवादन केले. यावेळी निवासी उपजिल्हाधिकारी संजीव जाधवर,

उपजिल्हाधिकारी रिता मैत्रेवार, जिल्हा कृषी अधीक्षक तुकाराम मोटे यांच्यासह जिल्हाधिकारी कार्यालयातील अधिकारी व कर्मचारी यावेळी उपस्थित होते.

******

प्लास्टिक बंदीवरील कार्यवाही तीव्र करा : पर्यावरण मंत्री आदित्य ठाकरे

_DSC9525

औरंगाबाद, दिनांक 13 (जिमाका) : औरंगाबाद शहराला प्लास्ट‍िक कचऱ्यापासून मुक्त करा. यासाठी प्लास्ट‍िक बंदीवरील कार्यवाही तीव्र करा. नागरिकांमध्ये प्लास्टिक बंदीबाबत जनजागृती करा. ‘मी प्लास्टिक वापरणार नाही’ ही लोकचळवळ व्हावी, या दृष्टीनेही प्रयत्न करा, अशा सूचना पर्यावरण, राजशिष्टाचार व पर्यटनमंत्री आदित्य ठाकरे यांनी आज मनपा प्रशासनाला केल्या. त्याचबरोबर शहर सुंदर बनविण्यासाठी आणि येथील पर्यटनाला अधिक चालना देण्यासाठी सर्व सोयी सुविधा नागरिकांना द्या, असेही श्री. ठाकरे यांनी अधिकाऱ्यांना सांगितले.

जिल्हाधिकारी कार्यालयाच्या सभागृहात महानगरपालिकेच्या विकासकामांसंदर्भातील आढावा बैठक श्री. ठाकरे यांच्या अध्यक्षतेखाली पार पडली. बैठकीस उद्योगमंत्री तथा पालकमंत्री सुभाष देसाई, खासदार इम्तियाज जलिल, आमदार अंबादास दानवे, महापौर नंदकुमार घोडेले, माजी खासदार चंद्रकांत खैरे, जिल्हाधिकारी उदय चौधरी, मनपा आयुक्त अस्तिककुमार पांडेय आदींसह लोकप्रतिनिधी, विविध विभागांचे  वरिष्ठ अधिकारी उपस्थित होते.

जागतिक पातळीवर औरंगाबाद जिल्ह्याचे पर्यटन क्षेत्रात नावलौकिक आहे. या ठिकाणी ऐतिहासिक असा अमुल्य ठेवा आहे. या शहराला अधिक सुंदर बनविण्यासाठी महापालिकेने अधिक कार्यक्षमपणे येथील नागरिकांना सुविधा देण्यावर भर द्यावा. कचऱ्याची विल्हेवाट योग्य पद्धतीने लावावी. त्यासाठी वर्गीकृतपणे कचऱ्याचे संकलन करावे. शहरातील रस्त्यांची योग्य देखभाल करावी. पदपथासाठी एम्बॉस काँक्रिटीकरण पर्यायाचा विचार करावा. त्याचबरोबर रस्त्याच्या पदपथाचे सुशोभिकरण करावे. रस्ता, पदपथ, दुभाजक, दिवे यांची दुरूस्ती सातत्याने करावी.  शहराला विद्रूप करणाऱ्या चारचाकी, अतिक्रमणे तत्काळ हटवावीत. वृक्षारोपणावरही भर द्यावा. शहरात नागरिकांना देण्यात येत असलेल्या शहर बस बरोबरच कमी पल्ल्याच्या अंतरासाठी मिनी बस असावी. तर पर्यटन बस सुविधा देण्याबाबतही मनपाने कार्यवाही करण्याला प्राधान्य द्यावे, अशा सूचना श्री. ठाकरे यांनी दिल्या.

तसेच वेरूळकडे जाण्यासाठी नवीन रस्ता, मनपाच्यावतीने तयार करण्यात येत असलेला सफारी पार्क, शहरातील नाट्य मंदिरे दुरूस्तीकरण आदींचा प्रस्ताव तत्काळ दाखल करण्याच्या सूचनाही श्री. ठाकरे यांनी आज दिल्या. पालकमंत्री देसाई यांनीही अधिकाऱ्यांना योग्य त्या सूचना केल्या.

मनपा आयुक्त पांडेय यांनी पीपीटीद्वारे माहिती सादर केली. यामध्ये शहरातील 100 कोटीतून तयार करण्यात येत असलेले रस्ते, मुख्यमंत्री शहर सडक योजना, नवीन पाणी पुरवठा योजनेची कार्यवाही, घनकचरा प्रक्रिया केंद्र, सातारा-देवळाई भूमिगत गटार योजना, सातारा-देवळाई भागातील रस्त्यांचा, उद्यानांचा विकास करणे, पथदिवे बसवणे, प्रधानमंत्री आवास योजना (शहरी), स्मार्ट सिटी प्रकल्पांतर्गत सफारी पार्क, स्मार्ट सिटी बस, स्मार्ट वॉक वे, नऊ दरवाजांचे संवर्धन, सलीम अली सरोवर येथील मलजल प्रक्रिया केंद्र आदींचा समावेश होता.

सुरवातीला जिल्हाधिकारी चौधरी यांनी ग्रंथ भेट देऊन श्री. ठाकरे यांचे स्वागत केले.

*****

जिल्ह्याच्या पर्यटन विकासाठी                            आवश्यक निधी उपलब्ध करुन देणार                            – पर्यटन मंत्री आदित्य ठाकरे

                                                      

औरंगाबाद, दि. 13 (जिमाका) : आंतरराष्ट्रीय पर्यटन नकाशावर पर्यटन जिल्हा म्हणून औरंगाबाद जिल्हयाचे महत्वपूर्ण स्थान आहे.त्यादृष्टीने  जिल्ह्यातील सर्व  पर्यटन स्थळांच्या   विकास कामांसाठी प्राधान्याने निधी उपलब्ध करुन दिला जाईल ,असे प्रतिपादन पर्यटन मंत्री आदित्य ठाकरे यांनी आज येथे केले.

जिल्हाधिकारी कार्यालयात आयोजित जिल्ह्यातील पर्यटन विकास कामांच्या आढावा बैठकीत  श्री. आदित्य ठाकरे  बोलत होते.  बैठकीस जिल्ह्याचे पालकमंत्री तथा राज्याचे उद्योग मंत्री सुभाष देसाई यांच्यासह खा.इम्तियाज जलील,आ.अंबादास दानवे,महापौर नंदकुमार घोडेले,जिल्हाधिकारी उदय चौधऱी , महानगर पालिका आयुक्त अस्तिककुमार पांडेय यांच्यासह इतर सर्व संबंधित लोकप्रतिनिधी , अधिकारी,उपस्थित होते.

श्री.ठाकरे यांनी यावेळी जिल्ह्यातील सर्व  पर्यटन स्थळी पूरक सोयीसुविधा असणे गरजेचे आहे.जेणेकरुन पर्यटक संख्येत वाढ होऊन येथे रोजगाराच्या संधी विस्तारण्यास चालना मिळेल. त्यादृष्टीने  पर्यटन स्थळांच्या विकासकामाला कालमर्यादेत गुणवत्तापूर्णरित्या पूर्णत्वास न्यावे असे सांगूण श्री.ठाकरे यांनी वेरुळ घृष्णेश्वर विकास आराखड्यातंर्गत करण्यात येत असलेल्या विकास कामांची माहिती घेतली. वेरुळ घृष्णेश्वर याठिकाणी संयुक्त बायपास रस्त्यासाठी आवश्यक असलेल्या 22 कोटींचा निधीच्या  नियोजन विभागाकडे पाठवलेल्या  प्रस्तावाचा पाठपुरावा करुन निधी उपलब्ध करुन दिला जाईल . या बायपास रस्तयामुळे येथील वेरुळ अभ्यागत केंद्राला भेट देणा-या पर्यटकांच्या संख्येत वाढ होण्यास मदत होईल असे श्री. ठाकरे यांनी सांगितले.तसेच दौलताबाद किल्ल्याच्या बाहेर असलेल्या ऐतिहासीक दरवाज्याच्या बाजूने रस्ता तयार करण्यासाठी आवश्यक असलेल्या निधीकरीता राज्य तसेच केंद्र शासनाकडे पाठपुरावा करण्यात येईल असे श्री.ठाकरे यांनी  यावेळी सांगितले.

पालकमंत्री यांनी जिल्हयाच्या सर्वांगिण विकासाला प्राधान्य देत सर्व यंत्रणांनी समन्वयपूर्वक विहीत कालमर्यादेत विकास कामे पूर्ण करावीत. प्राप्त निधीचा योग्य विनियोग करत जिल्ह्यातील विकास कामे दर्जेदाररित्या पूर्ण करावीत,अशा सूचना यावेळी संबंधितांना दिल्या.

महाराष्ट्र पर्यटन विकास महामंडळ यांनी तयार केलेल्या औरंगाबाद पर्यटनाबाबत माहिती देणा-या घडीपत्रिकेचे विमोचन यावेळी पर्यटन मंत्री श्री.ठाकरे आणि पालकमंत्री श्री.देसाई यांच्या हस्ते करण्यात आले. यावेळी जिल्हाधिकारी उदय चौधरी यांनी जिल्हयातील पर्यटन विकास कामांची माहिती दिली.

******

Create a free website or blog at WordPress.com.

Up ↑